 |
| Photo By N.A.M. |
Jang kasi mati itu api,
di tengah bunyi tifa deng suara nyanyi,
di balakang panggung yang rame-rame,
karna Injil itu bukan cuma acara—tapi nafas iman sampe mati.
Dulu, waktu Injil datang di tanah ini,
bukang dengan tari-tarian atau sorak sorai,
tapi dengan air mata, doa, deng hati yang tulus,
bawa kabar keselamatan, bukan untuk senang-senang—tapi untuk ubah hidup terus.
Sekarang katong rayakan tiap taon,
tapi coba tanya ale pung hati paling dalam:
“Katong masih hidup dalam terang Tuhan, atau cuma pura-pura saja?”
Apa katong pung kasih su jadi kebiasaan,
atau cuma tinggal di mulut waktu acara jalan?
Apa pengampunan masih hidup di katong pung hati,
atau katong su suka curiga, iri hati, deng saling benci?
Api Injil itu bukan cuma obor yang menyala,
tapi hati yang lembut, tangan yang mau tolong,
jiwa yang tahan dalam godaan,
hidup yang su jadi terang, walau dunia gelap sampe kosong.
Wariskan lebih dari cuma cerita,
wariskan iman yang masih bernyala,
wariskan sikap, tingkah laku yang baik,
supaya anak cucu bisa bilang:
“Begini cara hidup sebagai anak-anak terang.”
Ini acara bukan titik akhir,
tapi panggilan untuk bangkit deng berdiri,
jadi terang di tengah dunia yang su lelah,
jadi api kecil yang bisa bakar harapan baru di tiap jiwa.
Jang kasi mati itu api.
Jaga bae-bae di dalam hati,
dalam tutur kata,
deng tingkah laku.
Bukan satu kali satu taon,
tapi tiap hari sampe mati.
Biar dunia tau: Api Injil masih menyala,
karna ale su jaga itu api.
N.A.M.
Tidak ada komentar:
Posting Komentar